Árið 2024 var rafmyntafyrirtækið Tether sjöundi stærsti kaupandi bandarískra ríkisskuldabréfa á heimsvísu. Félagið jók eign sína um 33 milljarða bandaríkjadala, sem er meiri fjárfesting en sést hefur frá löndum á borð við Kanada, Taívan og Mexíkó. Nemur þessi fjárfesting nálægt landsframleiðslu Íslands fyrir sama ár. 

Þetta undirstrikar vaxandi áhrif stöðugleikamynta í fjármálakerfi heimsins. Tether gefur út stöðugleikamyntina USDT og nemur markaðsvirði hennar um 143 milljarða dollara. Stöðugleikamyntir eru rafmyntir sem fylgja gengi hefðbundinna gjaldmiðla. Að baki rafmyntunum eru fjárfestingar í ríkisvíxlum og innlánum í viðkomandi gjaldmiðli. Upphaflega voru þessar myntir eingöngu notaðar í viðskiptum með rafmyntir, en á síðustu árum hefur notkun þeirra verið að færast út fyrir rafmyntamarkaði og eru þær í auknu mæli nýttar í viðskiptum eða greiðslumiðlun um heim allan. Hægt er að senda þessar myntir hvert sem er á augabragði með ódýrum hætti sem er mikill ávinningur umfram hefðbundnar millifærslur.

Samhliða þessu hefur ný ríkisstjórn í Bandaríkjunum gefið út skýr skilaboð um að hún vilji styðja við þróun stöðugleikamynta með skýru regluverki. Þar kemur sérstaklega fram að stöðugleikamyntir geti orðið lykilstoð í fjármálakerfi framtíðarinnar, bæði í greiðslumiðlun og viðskiptum, sem og til að styðja við áframhaldandi stöðu Bandaríkjadollars sem varaforðamynt heimsins. Þá hafa bandarísk yfirvöld nefnt að markaðsvirði stöðugleikamynta gæti fljótlega numið þúsundum milljarða Bandaríkjadollara.