Sjálfstæður þjóðarsjóður Abu Dhabi, Mubadala Investment Company, tilkynnti í síðustu viku um kaup á Bitcoin kauphallarsjóðum BlackRock að andvirði 437 milljónir Bandaríkjadala. Mubadala, sem hefur yfir 280 milljarða dala í stýringu, hefur áður sýnt áhuga á þessum eignaflokki, meðal annars með fjárfestingum í Bitcoin námuvinnslu árið 2023.

Paul Tudor Jones tvöfaldar Bitcoin kaup

Fjárfestingasjóður hins þekkta bandaríska fjárfestis, Paul Tudor Jones, hefur meira en tvöfaldað eign sína í Bitcoin kauphallarsjóðum og á nú um 427 milljónir Bandaríkjadala miðað við lok árs 2024. Þá er þetta stærsta einstaka fjárfestingin í sjóðnum hans í einstökum verðbréfum eða kauphallarsjóðum.

Aukinn áhersla á Bitcoin í safni Paul Tudor Jones rímar við það sem hann sagði seint á síðasta ári:
"I think all roads lead to inflation. ... I'm long gold and Bitcoin"

Sjá nánar hér.

Bank of Montreal fjárfestir einnig í Bitcoin kauphallarsjóðum

Bank of Montreal (BMO), þriðji stærsti banki Kanada, hefur einnig tilkynnt um fjárfestingu í Bitcoin. Samkvæmt nýlegri skýrslu um eigendur Bitcoin kauphallasjóða m.v. síðustu áramót hefur BMO fjárfest fyrir um 150 milljónir dala í slíkum kauphallarsjóðum.

Eins og sjá má hér að ofan er áhugi hefðbundinna fjárfesta á Bitcoin sífellt að aukast. Þjóðarsjóðir, vogunarsjóðir, lífeyrissjóðir og bankar eru farnir að láta meira að sér kveða og búast má við að þessi þróun sé rétt að byrja.